“Shqiptarët janë si gurët e kalldrëmit, të bashkuar në një rrugë të gjatë që çon drejt një të ardhmeje të ndritur dhe të begatë”, shkruante Konica, në një dell të rallë optimizmi 100 vjet më parë. Megjithatë, për shumë kohë, e mbase askund më shumë se sa në fushën e turizmit, e ardhmja e ndritur ishte më shumë fryt i imagjinatës, se sa realitetit. Më kujtohet shumë mirë se si 23 vjet më parë, në organizimin e parë të madh të Bashkisë së Tiranës, se sa shumë muaj negociata dhe parapërgatitje u nevojitën për të sjellë “Scorpions” në Shqipëri. Më kujtohet gjithashtu se po aq e vështirë sa negociatat ishte të gjeje një akomodim të përshtatshëm për 76 personat që shoqëronin grupin. Është e jashtëzakonshme sa shumë ka ndryshuar Shqipëria që prej atëherë. Por, ka tre momente kyçe që dua

të nënvizoj: Në vitin 2014, kur realizonim objektivin e 3 milionë turistëve në vit dhe i vendosim vetes si objektiv dyfishimin e këtij numri, barra kryesore e ndryshimit binte mbi infrastrukturën. Dhe objektivat kyç lidheshin me ndërtimin e rrugëve të përshtatshme, me manaxhimin atëherë pothuajse ineksiztent të mbetjeve, mbi sigurimin e ujit e energjisë elektrike, sigurinë e plazheve, e gjera të tjera esenciale. Në vitin 2018, kur falë investimeve në infrastrukturë prekëm 6 milionë turistë dhe i vumë vetes qëllim të kapnim 10 milionë, u bë gjithmonë e më e rëndësishme të garantonim rritjen dhe diversifikimin e struktrave hoteliere, si dhe ofertës turistike shqiptare. Sot janë mbi 1.500 struktura gjithmonë e më cilësore, të cilave u shtohen çdo vit dhjetëra apo qindra të tjera, në gjendje të përballojne flukse të paimagjinueshme deri pak kohë më parë. Ndërsa sot, kur i kemi kapur 10 milionë turistë dhe ku falë zgjerimit e diversifikimit të ofertës turistike synojmë të kapim 15, vëmendja jonë është drejt përsosjes së mëtejshme të një marke tashmë të konsoliduar në Europë, markës sonë shqiptare.

Dhe këtë duam ta bëjmë duke u marrë edhe me atë që nuk kemi pasur luksin të merremi më parë: Detajet! Turizmi, për Shqipërinë ofron një shans të shkëlqyer që duhet të kapet në të gjithë dimensionin e tij. Është një mundësi transformimi jo vetëm për zonat turistike, komunitetet lokale apo strukturat akomoduese, por për të gjithë ekonominë dhe sipërmarrjen shqiptare. Ndaj nisma e sotme synon të përforcojë forcën transformuese të këtij sektori, duke e vendosur atë në shërbim të zhvillimit të qëndrueshëm të prodhuesve shqiptar. Duke nxitur përfshirjen sa më të gjerë të produkteve dhe markave shqiptare në zinxhin tonë akomodues dhe duke gërshetuar më të mirën që toka dhe njerëzit ofrojnë me atë që natyra na ka falur, jemi në gjendje t’i vendosim vetes një objektiv të ri ambicioz. 15 milion turistë dhe 5 miliardë eurove të ardhura në vit, që njohin përveç bukurive të natyrës dhe kulturën tonë, edhe verën, djathin, produktet bio, proshutën, mishin, e produkte të tjera vendase.

 

 

Dua të theksoj se sot, janë 250 mijë vende pune që krijohen apo mbështeten direkt apo indirekt nga turizmi. 1 në 5 shqiptarë sot punon direkt apo indirekt në sektorin e turizmit. Por, promovimi i produkteve vendase do të nxisë një efekt zinxhir, që do të rrisë mirëqënien dhe prodhimin përtej këtij sektori, duke nxitur më shumë punësim dhe më shumë të ardhura në sektorë si bujqësia, industria e lehtë, industria e komunikimit dhe teknologjisë, transporti, etj. Pra, një turizëm all-inclusive, që vihet në shërbim të të gjithëve, edhe atij qytatarit në qytetin e të cilit nuk vijnë pothuajse kurrë turistë. Edhe atij fermerit fshati I të cilit ndodhet shumë larg qendrave turistike. Dhe të gjithë të tjerëve, duke garantuar që të mirat e gjeneruara nga sektori me rritjen më të shpejtë në vend të ndahen në mënyrë të barabartë mes të gjithë shqiptarëve. Paralelisht dhe për të arritur këtë objektiv: – Shqipëria vijon të bëjë përpjekje për të përmirësuar më tej kuadrin e saj ligjor dhe rregullator për tërheqjen e investimeve të huaja në sektorin e turizmit.

– Kemi zbatuar reforma dhe aprovuar stimuj për rritjen e investimeve të huaja, duke përfshirë edhe incentiva për proceset e thjeshtuara burokratike. AIDA ka gjithashtu një rol shumë të rëndësishëm edhe në këtë drejtim.

 

-Pas miratimit të “Ligjit për Turizmit” dhe Ligjit “Për Investimet e Huaja”, edhe ligji Strategjik i Investimeve ofron garanci maksimale ligjore për investitorët e huaj.

 

Pa u zgjatur më tej Kam bindjen se “Zgjidh të Vendit” do të shndërrohet në një vokacion dhe udhërrëfyes të përbashkët për të gjithë ne. Për këtë, MEKI, Turizmi, Bujqësia, AIDA dhe institucionet e tjera kanë një rol të veçantë për të luajtur. Jam besimplotë, që do të jemi në lartësinë e vizionit të Shqipërisë 2030, një konkurrent I denjë në Champions Leaguen e turizmit botëror dhe pse jo, një lider absolut për vizitorë apo të ardhura nga turizmi për frymë. Faleminderit!