Panairi Shqiptar i Punës në Athinë – Një Sukses i Madh për Mundësitë e Punësimit në Shqipëri!

Më 2 mars 2024, Athina u bë epiqendra e një eventi të rëndësishëm për shqiptarët që jetojnë dhe punojnë në Greqi. Panairi Shqiptar i Punës “Puno & Jeto aty ku ke zemrën” mblodhi mbi 120 biznese shqiptare, të cilat prezantuan oferta të shumta punësimi për profesionistë të fushave të ndryshme. Ky panair shënoi një hap të madh drejt afrimit të fuqisë punëtore shqiptare me tregun e punës në Shqipëri, duke ofruar paga konkurruese nga 1,000 deri në 6,000 euro për 40% të profesioneve.

Panairi u mbajt në Technopolis City (Gazi), pranë stacionit të metrosë Keramikos, një vend strategjik që tërhoqi mijëra vizitorë shqiptarë që jetojnë në Greqi. Gjatë këtij eventi, pjesëmarrësit patën mundësinë:

• Të takohen drejtpërdrejt me punëdhënësit shqiptarë.
•  Të informohen mbi vendet e lira të punës dhe kushtet e punësimit në Shqipëri.
• Të eksplorojnë kontrata të gatshme pune, veçanërisht për profesione të kërkuara si shoferë, inxhinierë, profesionistë të IT-së, ndërtues, ekonomistë e shumë të tjerë
• Të marrin një pasqyrë të qartë mbi zhvillimin ekonomik dhe mundësitë e karrierës në Shqipëri.

Me praninë e Kryeministrit Edi Rama, si dhe ministrave dhe zyrtarëve të lartë si Belinda Balluku, Ogerta Manastirliu, Mirela Kumbaro, Petrit Malaj, Anila Denaj, Delina Ibrahimaj, Arbjan Mazniku, Bora Muzhaqi, të cilët përcollën mesazhin se Shqipëria sot ofron më shumë mundësi se kurrë më parë për profesionistët shqiptarë që dëshirojnë të rikthehen në vendin e tyre.

Në fjalën e tij, Kryeministri Rama theksoi konkurrencën e tregut të punës shqiptar me atë grek, duke u ndalur te fakti se:

-Nuk ka pagë nën 1,200 euro për shoferët, ndërsa për shoferët e mjeteve të rënda, paga shkon deri në 2,500 euro.
– Shumë biznese shqiptare kanë gati kontratat e punës për t’u firmosur menjëherë.
– Shqipëria po ofron një realitet të ri ekonomik dhe mundësi për të ndërtuar një të ardhme të qëndrueshme në vend.

Panairi nuk ishte vetëm një mundësi punësimi, por edhe një moment reflektimi për shqiptarët që kanë vite që jetojnë në Greqi. Me një atmosferë të mbushur me muzikë, biseda frymëzuese dhe një ndjenjë të fortë atdhedashurie, ky event shërbeu si një pikë takimi për bashkatdhetarët tanë, duke i dhënë secilit një perspektivë të re mbi mundësitë që ofron Shqipëria sot.

Rezultatet e këtij panairi ishin të dukshme – dhjetëra kontrata pune u firmosën në vend, ndërsa mijëra pjesëmarrës u informuan mbi sektorët më të kërkuar në tregun shqiptar. Interesi i lartë dhe angazhimi i qeverisë dhe biznesit shqiptar tregojnë qartë se Shqipëria tashmë është një vend me një ekonomi në zhvillim, ku profesionistët shqiptarë mund të gjejnë mundësi të denja punësimi.

Panairi Shqiptar i Punës në Athinë ishte më shumë se një event – ishte një ftesë konkrete për çdo shqiptar që dëshiron të ndërtojë një të ardhme aty ku zemra rreh më fort!

Foto Album